美軍機屢犯我境 是可忍孰不可忍-www.thaiboxinghk.com

美軍機屢犯我境 是可忍孰不可忍

試想像有個流氓揸住把刀成日喺你屋企門口鬼鬼祟祟,探頭探腦,都唔知係想(目及)你嬌妻定係想打劫,喺呢個情況下,正常人自不然擸支大棒趕佢出去喇。

冇錯嘞,美國佬咪就係現實生活裏面嗰個不懷好意嘅流氓囉。美軍繼派出戰艦進入中國南海島嶼十二海里範圍,日前又派偵察機到香港鄰近空域進行非法偵察活動,結果被中國戰機成功攔截。最離譜嘅係,美國佬惡人先告狀,話中方攔截行為「非常危險」喎。查實上述空域屬中國專屬經濟區範圍,美國軍機擅自闖入,明顯違反國際法,中方攔截完全合理合法。

當然喇,同山姆大叔講道理,同對牛彈琴冇咩分別,佢哋永遠都係只許自己放火,不許別人點燈。美國軍艦同軍機喺人哋地頭自出自入,耀武揚威,美其名「航行自由」、「航空自由」,講到好似全世界都係美國內海領空咁,試嚇掉番轉吖嗱,你估美國佬會唔會同你客氣?美國成日揦住《聯合國海洋法公約》當令箭,對其他國家指指點點,原來佢哋根本唔係簽署國,呢啲唔係雙重標準又係乜?

話時話,美國佬嚴以律人,寬以待己,世人早就領教不少。最近搞到全球雞毛鴨血嗰隻勒索軟件WannaCry,美國國安局被踢爆係罪魁禍首,相關系統漏洞正正係用嚟對付敵對組織嘅「彈藥」,美國佬平時大大聲指摘中國、俄羅斯係黑客大國,其實只係賊喊捉賊。呢,走佬特工斯諾登之所以走佬,咪就係因為睇唔過眼美國政府講一套做一套囉!

講番美國軍機擅闖香港鄰近空域呢單嘢,除咗暴露美國佬霸道嘅牛仔作風,仲對本港民航安全構成極大威脅。事關涉事空域係本港飛行情報區,由香港民航處規管,按照國際民航組織規定,外國飛機進入時必須申報,否則大家唔知對方位置同航線,分分鐘迎頭對撼。不過嘥氣啦,正如民航處前處長樂鞏南話齋,美國軍機亂入港境已經唔係第一次,佢哋既唔肯向處方報到,又唔肯開雷達,抗議又當耳邊風,直頭當香港人冇到。

對於美軍新一輪挑釁中國行動,有人話係因為「香格里拉對話」舉行在即,華府為增加話語權故意製造事端,亦有人分析同中國喺聯合國安理會否決對朝新一輪制裁有關,但點講都好,可以肯定嘅係,香港人嘅安危從來唔係美國人考慮之列。

美國佬就係咁o架嘞,所謂「美國利益優先」,其實只係「寧教我負天下人,莫教天下人負我」嘅美式說法,以漢奸黎為首嘅一眾洋奴賣港賊死抱美國佬大腿,認賊作父,想唔認民族敗類都唔得!


本文來源:http://orientaldaily.on.cc/cnt/news/20170529/00190_001.html




Tag:
本文链接:http://www.thaiboxinghk.com/9392.html