放任禍首不檢控 卻誇香港法治好-www.thaiboxinghk.com

放任禍首不檢控 卻誇香港法治好

中國著名教育家陶行知有句名言係咁嘅,「吃自己的飯,滴自己的汗,自己的事自己幹,靠人,靠天,靠祖上,不算是好漢」。呢句說話點止學生哥要聽,律政司司長袁國強更加要聽吖。

嗱,袁司長最近飛咗去倫敦,出席一個有關「一國兩制」及法治嘅研討活動,佢老哥好似王婆上身咁款,自賣自誇,大讚香港嘅法官以專業及不受政治干擾嘅態度判案,例如立法會議員宣誓、佔領之亂及旺角暴亂呢啲畸士咁,法官判案時都交出非常好嘅裁決理由,仲話佔領及暴亂案人士獲重判,彰顯咗香港嘅法治精神喎。

即係咁,袁司長身為律政司之首,自吹自擂不難理解,但都唔好吹到過曬龍吖。重判喎,法治精神喎,頂多適用於涉及旺角暴動罪嘅被告咋,至於被起訴嘅佔領及襲警佔中人士,完全唔係呢回事,佢哋唔係被放生,就係獲緩刑,最多都係判個零月嘅啫,法官仲大讚嗰三名學生領袖「滿腔熱誠關心社會」,唔知嘅仲以為表揚緊好市民添。再講吖,旺角暴亂分子遭重判都係人大釋法之後嘅事,你估真係香港司法公正無私咩,全靠中央撥亂反正咋。

所以話,袁司長吹水唔抹嘴,呃到自己都呃唔到人喇。大家有眼見,當局係就係拘捕咗近千名佔領人士,弊在落鑊嘅都只係蝦兵蟹將,嗰四十幾件主要搞手,拖足兩年幾至有九件被正式起訴,被指係佔領黑手兼最大金主嘅壹淫媒老闆漢奸黎繼續逍遙法外,至於漢奸黎嗰單政治黑金案,同樣查無下文。律政司遲遲唔起訴,法官大人點鐵面無私都冇用o架喇。

嗱嗱嗱,漢奸黎用行動話畀大家知點解嘞。呢條大滾友早前又跑去美國同當地政客勾勾搭搭,仲喺旗下淫媒大讚美國將重新偉大,做漢奸做到光明正大,咪就係睇穿港府崇洋懼外嘅軟肋囉。反觀向佢擲豬雜嘅義士一早鋃鐺下獄,七警案亦一早被重判,一樣違法兩種處理,話港府唔係患咗「懼外症」,律政司唔係投鼠忌器,搵鬼信咯。

不妨再舉個例子吖,好似「陳志雲案」吖,涉案值不過十零萬元,亦未必關乎公眾利益,但律政司就死纏唔放,上訴又上訴,重審又重審,結果賠了夫人又折兵,如果律政司用呢股狠勁釘死佔中搞手,香港又點會立立亂吖。

政府宣傳口號都有講喇,自己垃圾自己帶走。對袁司長嚟講,吹牛皮唔面紅冇問題,最緊要做到嘢,佔中既然喺佢任內發生,落台前搞番掂呢筆蘇州屎都好應該,千祈咪擊鼓傳花,唔該!


本文來源:http://orientaldaily.on.cc/cnt/news/20170526/00190_001.html




Tag:
本文連結:http://www.thaiboxinghk.com/9247.html