中大宿舍終補鑊 第四權再建一功-www.thaiboxinghk.com

中大宿舍終補鑊 第四權再建一功

美國前總統傑弗遜曾誙講過,如果要喺報紙同政府之間二選一,會毫不猶疑選擇前者。咁又係吖,今時今日呢個政府冇神經冇靈魂,廢到無倫,揭醜揭弊推動社會進步,唔靠好似東方咁嘅正義傳媒克盡第四權天職,仲可以靠邊個吖?

唔係功夫茶賣花讚花香,中大韓籍男生懷疑喺宿舍隊草裸跑兼企圖非禮,東網記者第一時間直擊涉事宿舍保安漏洞,街外人唔單止可以自出自入,仲可以喺男女樓層來去自如,十足十無掩雞籠,結果打針都冇咁快,就喺本報踢爆保安漏洞後,中大宿舍管理部門急急補鑊,規定涉事宿舍地下大堂門口每晚十一點到第二朝八點半關閉,包括宿生在內嘅任何人士均不得出入,而日頭亦隻限宿生同埋工友通行。

嗱,有學者就講得啱嘞,韓籍男生裸跑事件令全城震驚,市民難免進一步關注大學宿舍保安,如果唔係東方即時跟進報道,帶嚟輿論壓力,有關方麵都唔知幾時至肯正視問題。東方揭露社會陰暗麵,迫使有關方麵即時做嘢,呢啲咪第四權精神囉!

成件事一清二楚,東方報道既滿足公眾知情權,亦保障學生安全,可惜有啲人唔領情之餘仲一味死撐,又發聲明「譴責」,又發投訴電郵聲稱學生私隱被侵犯,寫投訴信又寫到烏龍百出,搞錯事實寫錯日期白字連篇,連「罔顧」都有本事寫成「岡顧」,完全罔顧辛苦供佢哋讀書嘅父母感受。

話時話,本報踢爆大學宿舍保安管理問題,實在非常必要。近年大學宿舍亂象叢生,迎新活動AV化,欺淩當傳統不在話下,最令人擔心嘅係大學宿舍淪為學生胡作非為嘅「保護傘」,儼然罪惡溫床,試過有港大學生喺宿舍種大麻;有理大學生公然喺宿舍開荒淫派對;至於宿舍內偷竊、偷拍裙底春等事件,更加多到天光都數唔曬。

古人話齋︰少年智則國智,少年強則國強,部分年輕人以為自己真理在手,就可以目空一切,想點就點,校園有乜法子唔烏煙瘴氣,成個社會有乜法子唔七國咁亂?本來呢,年輕人有犯錯嘅本錢,一時走歪路唔緊要,隻要有人從旁提醒就得。可惜吖,有啲教育工作者一味鄉願,麵對年輕人錯誤唔敢出麵指正,反而曲意寬容,講得好聽就沽名釣譽博掌聲,講得難聽直頭誤人子弟。至於嗰啲鼓吹「唔守法唔等於唔尊重法律」歪理嘅所謂教授,直頭枉為人師添喇。

一句講曬,正義傳媒為民喉舌、針砭時弊,幾十年如一日,路見不平一聲吼,天王都無麵畀!


本文來源:http://orientaldaily.on.cc/cnt/news/20170520/00190_001.html




Tag:
本文链接:http://www.thaiboxinghk.com/8909.html