既得利益不打破 醫醫相護無窮禍-www.thaiboxinghk.com

既得利益不打破 醫醫相護無窮禍

聯合醫院兩名醫生涉睇漏病歷開漏藥,結果連累好媽媽鄧桂思肝衰竭兩度換肝,之後更延遲通報,一味隱瞞,唔單止全城憤怒,更引發市民拒捐器官潮。如果話呢單世紀醜聞有咩「正面意義」,就係再次揭露公營醫療系統醫醫相護積弊極深,一日唔對既得利益者動手,醫療亂象只會陸續有來。

冇錯嘞,類似鄧媽媽咁被開漏藥嘅畸士,已經唔係第一次發生。一位患乙型肝炎嘅腎病病人,○九年同樣因主診醫生處方高劑量類固醇時,冇同時處方抗乙肝病毒藥物,情況持續近一年,最終因為等唔切換肝而肝衰竭死亡,而最離譜嘅係,醫委會今年初以當年冇相關用藥指引為由,放生涉事醫生。咁就難怪家屬嬲爆,直斥公立醫院罔顧人命,令慘劇事隔八年又重演。家屬嘅怒吼,同時亦講出大部分市民嘅心聲,正如「東方報業民意調查」顯示,大部分受訪者狠批醫管局冇吸取教訓,風險管理工作不足,以致不斷重複犯錯。

講到呢度,功夫茶忽然諗起一樣嘢,醫療事故三日唔埋兩日一單,周不時都有苦主家屬血淚大控訴,但其實佢哋表現已經相當斯文,相當克制,特別係鄧媽媽囡囡,喺怪責庸醫之餘,都不忘關心其他不幸家庭,希望事件唔好重演,不知幾得體。試吓換轉內地,家屬早就衝入醫院開大片,仲同你客氣咩!

不過話又要講番轉頭,香港地之所以冇類似醫鬧問題,唔係話醫療質素比內地高幾多,而可能只係兩地民風不同咋。嗱,醫管局指引明明寫得清清楚楚,公院發生重大醫療事故,必須二十四小時內通報醫管局,醫院要喺四十八小時內成立調查小組,結果今次聯合醫院睬你都有味,冇及時通報之餘仲不斷作藉口抵賴,據聞食衞局局長高永文都係近日至知悉事件,成件事欺上瞞下,黑幕重重,唔好得過內地幾多嘅咋。

有業界人士就講得啱嘞。本港通報制度比起外國一啲都唔落後,問題係唔少醫護人員擔心被怪罪又或者畀人篤背脊,於是瞞得就瞞,冚得就冚。冇計喇,醫護人員犯錯零成本,咪有恃無恐囉。

所以話啫,本港公立醫院亂象叢生,事故不絕,講到底都係醫管局以至港府管治無能惹嘅禍。前線醫護呢頭呻人手不足呻到樹葉落,嗰頭一聽到輸入外地醫生就群起反對,港府一樣無符;明知醫管局內部山頭林立,之前實牙實齒話要大刀闊斧改革,結果又係雷大雨小,想唔認無能都唔得。

點講都好喇,人嘅容忍始終有限度,醫療事故繼續鑊鑊新鮮鑊鑊甘,睇怕香港醫生遲早要學內地行家咁,戴埋頭盔着埋避彈衣返工吖!


本文來源:http://orientaldaily.on.cc/cnt/news/20170515/00190_001.html




Tag:
本文链接:http://www.thaiboxinghk.com/8606.html