【即時文摘】央企油站搶佔市場(左丁山)-www.thaiboxinghk.com

【即時文摘】央企油站搶佔市場(左丁山)

香港汽油價格高到全世界第一,有特殊因素,消委會與競委會為咗證明自己有存在價值,必定贒到油公司實一實,希望做到為民請命呢個高貴目的。油公司對此豈有不知之理,競委會既然做咗第一次研究之後,搵唔到油公司合謀定價與加快減慢嘅證據,消委會大概可以收聲嘞,無謂嘥時間又做多一次調查。
香港汽油價格高昂,有兩大不能動搖嘅基本因素,競委會與消委會不能假作不知。第一,4月27日左丁山汽車在加德士油站入油,無鉛油稅每公升收6.06港元,佔該日零售價15.04之40%,如果與加德士售價8.98元比較,油稅係67.48%,應該係全世界最高昂之油稅,美國總統特朗普夠強硬嘞啩,把口話要考慮設立汽油稅,到現時仍然無動作,其實美國歷任總統都唔敢提出徵收汽油稅。印尼素來有國家津貼油價,維多多總統上台後,削減汽油補貼,印尼汽油價急升,即時引起暴動,台灣亦有汽油補貼多年㗎!中國大陸更係由發改委決定汽油零售價,有補貼無徵稅,香港能夠徵收極高汽油稅多年而未曾引起騷動,外國人服到貼地,特區政府有咁好咁穩定稅收來源,邊一位財政司夠膽撤銷呀?何況高油稅係環保政策一大支柱,首次汽車登記稅及高油稅皆有抑壓汽車排放及節能嘅社會作用,環保人士一定極力反對削減油稅。
第二,香港寸金尺土,墳場邊皮嘅豪宅都賣到三萬幾蚊一呎,位於市區鬧市及近隧道嘅油站,標投地價一定高昂。政府收錢收到笑,因為價高者得吖嗎,政府夠唔夠膽不採取價高者得呢個模式嚟出租官地做油站?唔敢囉,否則有關官員一定會去廉署飲咖啡,任何一個政府委員會叫政府批地俾商營油公司做油站,都係常識之言!呢兩大結構性基本因素,油稅加地租攤分已令香港汽油價格居高不下,現在還有一個微妙因素,就係中央有意無意之間,透過中石油與中石化爭奪汽油供應呢個在北京眼中嘅戰略性行業,由2005至2015年,三間美資油公司嘅市佔率已由90%下降至74%,兩間央企市佔率由3%急升至26%,其他公司嘅市佔率由7%變成零,中石油與中石化點解可以擴大市佔率?好簡單啫,每次美資油站營運期夠鐘,政府再招標,兩大央企就出高價逼走美資油站,形成油站之地價愈來愈高,汽油價愈是難以降低,呢個中資進,美資退嘅循環還在運行,表示未來汽油價格易升難跌。競委會建議降低進入市場及擴充業務的門檻,純屬書生之見,完全不懂汽油市場政治經濟學!


本文來源:http://hk.apple.nextmedia.com/realtime/supplement/20170511/56674239




Tag:
本文連結:http://www.thaiboxinghk.com/8457.html