政情:暴力難解困 慈悲心紓紛爭 梁愛詩教港人洗「躁」-www.thaiboxinghk.com

政情:暴力難解困 慈悲心紓紛爭 梁愛詩教港人洗「躁」

近年香港社會立立亂,基本法委員會副主席梁愛詩尋日出席佛教嘉年華活動時,就以佔中、佔旺做例子,批評有小部分港人以為暴力可解決問題,而社會紛爭愈嚟愈多,令到好多人心情浮躁,佢希望港人會以佛陀為榜樣,學識多啲包容、少啲執著。適逢尋日係佛誕日,亦會進行浴佛儀式,睇嚟梁愛詩係想借浴佛呼籲港人洗「躁」嘞!

二○一四年爆發歷時七十九日嘅佔領行動,搞到社會撕裂,更令本土同港獨思潮崛起,經歷旺角暴亂事件後,仲發生佔領西環、立法會宣誓風波,愈演愈烈。早前部分佔中搞手同參與旺角暴亂嘅人士被檢控,民主黨(白鴿黨)主席胡誌偉竟然拋出「特赦論」,話希望新政府上任後,可以特赦同佔領行動有關連嘅人士,包括七警同埋佔中人士,以換取「大和解」。但此話一出,就畀包括泛民在內嘅唔同黨派炮轟,胡誌偉惟有急急跪低,收回相關言論兼道歉。

以「亂」同「變」形容現今世界

社會爭拗無日無之,梁愛詩尋日喺活動中亦話,依家世界烽火滿地,政府之間就劍拔弩張、導彈相向,搞到全世界隻可以用「亂」同「變」呢兩個字嚟形容。佢覺得喺世界中,香港人係身在福地,但社會紛爭就愈嚟愈多,大家之間嘅矛盾亦都變得激烈,好多人心情浮躁,甚至有小部分人以為可以以暴力解決問題,例如佔中佔旺,令人擔心。

到底可以點解決呢?梁愛詩就覺得港人要以佛陀為榜樣,發慈悲之心、懂得自我反省、清潔心靈、多點包容、少點執著,拋開煩惱,心靈就可以得到解放,無論麵對順境或逆境,都可以安然自在。

對新一屆政府充滿信心

提及香港回歸二十年,佢認為喺一國兩製下亦都度過咗無縫交接,仲因國家經濟強勁而可以繼續發展金融同經貿等行業,雖然過程中有啲挫折,但不減香港嘅繁榮穩定。對於新一屆政府,佢就話充滿信心,相信可以恢復社會和諧,市民都會團結一致。


本文來源:http://orientaldaily.on.cc/cnt/news/20170504/00176_072.html




Tag:
本文链接:http://www.thaiboxinghk.com/8030.html