急症收費狂加價 官僚卸責太冷血-www.thaiboxinghk.com

急症收費狂加價 官僚卸責太冷血

特區政府冇嘢叻,最叻就係卸膊,唔係用者自付就係寓禁於徵,搞到怨聲載道。最新例子係急症室收費,政府建議由原本一百蚊加到去一百八十蚊,增幅達八成咁多,簡直係飛擒大咬。

姑且聽嚇官老爺點解釋。佢哋話喎,醫管局喺一五年展開檢討後,建議急症室收費加至二百二十港元,食衞局參考各方意見後,平衡恰當使用急症室同基層市民負擔能力,「中間落墨」建議收一百八十元,話咁樣做可以防止市民濫用,預計今年年中就會實施。除咗急症室服務外,普通科門診以及住院等收費都會上調。

去過街市買餸嘅,都知道呢啲叫「開天索價落地還錢」,以往公共交通加票價港府成日用呢招,扮曬廣納民意咁。之不過早排有人做過民意調查,發現六成半人反對加價,近八成人認為就算加價長者都應收費不變,至於最合理收費水平頂多係一百三十元,呢啲民意又唔見當局從善如流?

當局狂加急症室收費,無非想逼病人轉去幫襯私家診所啫,如果呢個邏輯成立,不如唔好收一百八十啦,索性收八百一十,到時公立急症室收費拍住私家醫院,病人咪唔使排長龍囉!

有立法會議員就講得啱,好多偏遠地區好似天水圍、東涌咁,假日診所、夜診等服務嚴重不足,病人惟有焗住去公立醫院求診,加價除咗加重佢哋負擔,根本無助紓緩緊張情況。再講吖,即使真係有人濫用急症室,有乜理由一刀切增加收費,要其他真正有需要嘅病人一齊受罰呢?

好明顯喇,醫管局唔改善服務,增加資源,反而一味向市民荷包開刀,根本就係本末倒置。第樣嘢唔講,淨係講醫護人手不足,唔少市民贊成從海外輸入人才,無奈當局無法擺平既得利益集團嘅阻力;其他好似醫管局肥上瘦下、管理混亂,醫療事故無日無之等等老大難問題,更加不在話下。

不過大家都見怪不怪咯,港產官僚嘅管治哲學只有一條,就係「收錢」。解決塞車問題,加私家車首次登記稅、加過海隧道費用;面對垃圾圍城,唔係膠袋徵費就係家居垃圾徵費,結果係點大家有眼見,條路一樣咁塞,垃圾一樣咁多。今次急症室加費仲衰,話口未完機場快綫又話加票價一成,嚟緊唔知仲會引發幾多連鎖效應,市民肉隨砧板上,都咪話唔無奈。

睇嚇香港地呢班廢官,薪水係世界一流,但唔係解決問題,而係一味添煩添亂。既然官僚咁迷信錢能通神,可以解決到所有難題,咁不如將佢哋嘅人工同工作表現掛鈎喇!


本文來源:http://orientaldaily.on.cc/cnt/news/20170419/00190_001.html




Tag:
本文链接:http://www.thaiboxinghk.com/7154.html