【月租七千】22年租金有減冇加 越南粉小店老闆:呢種業主好難搵!

★★★★★★★★★★
果籽今日推介

【文具科學】擦得甩原子筆點解擦得甩?可以還原嗎?
http://bit.ly/2pmEs5j

【10日測試】家用gel甲機買一部=出去gel一次 效果差幾遠?
http://bit.ly/2pmBm19

【大陸毒螺】香港有冇得食? 李彩華︰見過類似嘅款
http://bit.ly/2pmyrFW

★★★★★★★★★★

「我和熟客講,我呢度租7,000蚊,業主廿年無加我租,佢哋話而家好難再搵到呢種業主。我話係啊!而家真係好難搵!」樣子有幾分似薯片叔叔的金來越南粉老闆倪漢強說。1995年,他將舖頭遷入葵涌光輝圍,月租9,000元,兩年後九七金融風暴,業主減租2,000元,廿年來每月只交7,000元,兩人非親非故,卻擁有一段難能可貴的情誼。

其時搬舖全因舊業主加租,1991年倪漢強用上大部份積蓄在深水埗開舖,店內只有八人座位,累積了一班熟客,四年後,業主竟加雙倍租。他不屈服,決心遷走,在報紙上見到招租廣告,便選擇到葵涌光輝圍延續引以為傲的越南粉,更廿年來每月只交7,000元,「業主話最緊要我哋搵到餐飯食,搵唔到,加租都無用!我呢個租客無乜事都唔會煩佢,鐵閘壞咗,自己搞到都自己搞,每個月一定準時交租,一毫子租都不會欠!」倪漢強說。他的越南粉在葵涌一個簡陋商場內,裝潢陳舊,人迹罕見,卻是一間很特別的舖。牆上貼滿老闆手寫的餐牌,字體不算美觀,卻很有風格,一目了然。

一到門口,已聞到香濃牛湯味。「喺我未租之前,呢度一年已換了四個老闆,但我一來便廿多年了。這裏偏僻,得熟客先會識嚟幫襯,如果不真材實料,邊有得做,每次用約十斤牛骨煲湯,要熬通宵,好彩我夠猛火,我主力做越南河,如果唔做得好,點樣做到生意!」他邊熬湯邊說。雖然舖位置偏僻,但隔籬賣粉麵、同樣尺寸的舖位已經要兩萬多元,他月租7,000元實低於市價。「我根本同業主唔識,都係睇報紙頂番嚟,見面都無五次,可能見大家投契。佢數年前過咗身,將業權轉咗俾個女,不過一切照舊,接手十年都無加租。好多業主見到你有客就加租,搶錢啊!無諗過做餐廳嘅開支有幾大,就算老業主唔交租,接手嘅下一代都會加,好多都唔會有情講,所以呢個業主可以話去邊度搵啊!我係好運啊!」廿多年來,他只試過因身體不舒服,遲交過一次租,笑說:「我默默交租,他默默收租。」

只賣一款湯底 堅持不加味精
倪老闆賣的越南河只有一款湯底,但每個熟客都懂得自行調配酸和辣度。他本身對味精敏感,堅持不加味精。「我出去食飯,經常食到個頭爆炸,隨時帶定包必理痛,後來先知係味精敏感,而家都好少出去食,驚都驚咗。」店還提供坊間少見的腍肉(經特別醃製的豬肉),來貨價越來越貴,每磅要200元,經常斷貨,質感似香腸帶鹹香,十分開胃。「好多越南餐廳連樓面都唔識咩叫腍肉,我有諗過唔賣,但我開檔開了廿多年,客人吃慣咗,都係一種情意結。」小店只有兩夫婦做,倪老闆主理麵檔,太太則負責包春卷、咖喱角,煲豆漿、菊花茶,不假手於人,去年只休息了三日。「我97至07年未加過價,差不多十年了,但呢幾年物價太貴,先無辦法,一年加一元,都知道打工仔好難捱,所以都唔敢加得多。」他續說,「我根本無任何壓力,仔大女大,租平,唔使經常諗呢個無錢交、那個唔夠錢交,我都希望做得幾耐得幾耐。」

金來越南粉
葵興葵涌道1001號德昌大廈地面商場

記者:何嘉茵
攝影:伍慶泉

2017果籽繼續認真知味。識買惜用。行以求知。好事多為。重修舊好。
緊貼果籽報道,即like:http://fb.me/AS.AppleDaily 【月租七千】22年租金有減冇加越南粉小店老闆:呢種業主好難搵!

本文來源:http://hk.apple.nextmedia.com/realtime/supplement/20170417/56565110




Tag:
本文链接:http://www.thaiboxinghk.com/7032.html