【圖輯】深水埗熟食墟市越夜越多like 魚蛋大如拳頭勁搶手-www.thaiboxinghk.com

【圖輯】深水埗熟食墟市越夜越多like 魚蛋大如拳頭勁搶手

復活節假期開始,關注綜援低收入聯盟等地區團體今日及明日在深水埗舉行復活節墟市,有14檔熟食檔及36檔乾貨檔,是本港首個合法使用明火的節日熟食墟市,吸引大批市民支持,熟食檔最受歡迎,有出售狗仔粉的攤檔,在開售一小時已經售罄。

在農曆新年墟市時曾擺攤的林太表示,今次墟市繼續售賣狗仔粉及粟米杯等熟食,為響應復活節,她更售賣蝶豆花茶爆珠啫喱蛋。攤檔開售一小時,狗仔粉已全部售罄,「以為今晚7、8點都賣唔曬,點知唔洗一個鐘兩大煲狗仔粉已經賣曬,但食物已經比上次預多咗一倍,都賣曬」,預料生意與上次相若,「都係幾千蚊」,她笑言今晚售罄食物後將到旁邊幫其他墟市推廣,「希望一齊旺!」

林太續指,由於食物量較多,故其攤檔沒有使用明火煮食爐,但支持墟市可使用明火,「我哋唔係話要賺好多錢,但想話畀政府聽,其實香港市民消費模式改變咗,想搵番本土特色,想搵番以前自己食過嘅特色,唯有墟市可以滿足到,每家人做嘅都係自家製,出麵食唔到。」

梁先生擺檔賣紅油抄手及糖不甩,其中紅油抄手最受歡迎,攤檔長期有人排隊。對於首次使用明火煮食,他稱火爐較電磁爐好,「個火猛咗,因為上次電磁爐個火好慢,依家個火都ok,快啲、同埋食物熟啲,安全啲。」他指,由於復活節假期,難以估計有多少人外遊,故準備食材較上次少,但最後人流較預期多,「可以用埋聽日嘅食材先,聽日都會預定多啲食物。」被問到是否支持明火煮食的墟食,他稱「當然支持」,但認為有改善空間,「暫時都好好,但如果有兩個爐更加好,因為煮糖不甩就煮唔到抄手,希望下次可以兩個爐。」

人流最旺的是出售土耳其咖啡的攤檔,檔主葉小姐指,非常支持墟市可以為常設墟市,認為政府近年十分支持,「佢肯搞依個墟市已經係好開始,期望日後可常設。」她指,今日生意與農曆新年時差不多,亦已經預備多一倍的食材,「生意都幾好,就快賣曬,聽日會預多啲。」

郭先生帶同5歲女兒到墟市,「第一次嚟,畀佢睇嚇唔同嘢,因為比較少機會到墟市,嚟到先知有咁多嘢食,之前唔知係明火煮食。」他們品嚐了豆腐花及魚旦,女兒表示「好食!」郭生支持明火煮食的墟市,「無問題,open area做足措施係無問題,以後會多啲帶小朋友嚟,」

陳小姐與潘小姐在友人推薦下特意「襯墟」,「好熱鬧,有好多特色商品,陣間會行嚇。」二人購買了糖不甩,認為整體熟食「都幾香,幾吸引」。被問到會否支持多舉辦墟市,陳表示支持,「係一種特色,假日搞可以吸引更多人嚟,其他人嚟亦可以認識到本地文化,係一個地方比一家大細、情侶嚟。」

本文來源:http://hk.apple.nextmedia.com/realtime/news/20170415/56569642




Tag:
本文链接:http://www.thaiboxinghk.com/6990.html