【即時文摘】要優質的士(左丁山)-www.thaiboxinghk.com

【即時文摘】要優質的士(左丁山)

呢晚黃昏時候,離開中環,喺萬宜大廈門口碰到住在沙田嘅HR專家C女士,C女士本來在大埔工業區返工,好少在中環見到佢嘅,C女士話是日出中環上訓練課程,五點半先至完畢,想話搭的士趕返屋企,預備叫Uber。使唔使呀,左丁山遙指中環中心大道中旁邊,已經有過海的士等緊客啦!於是佢急急腳走過去,一聲:「西隧去沙田。」司機即刻笑笑口,歡迎C女士上車。中環中心去沙田,車錢約莫要收130元,行西隧又比較順暢,過海的士梗係想做啦,服務好好㖭,但如果你講:「紅隧過紅磡,唔該。」司機分分鐘變臉,話好塞車,唔肯去,諸多扭擰,令乘客好冇癮。C女士後來打電話嚟講開,上星期三晚沙田跑夜馬,散場後馬會大門口的士站大排長龍,站在佢地前面嘅乘客話去大埔,點知司機發曬脾氣,唔肯去,令到後面啲車更加塞住。C女士當時心諗:「死嘞,我地要返火炭,等陣咪一定鬧交?」由馬會坐的士去駿景園,一啲司機會使出高速轉彎突然踩慢一招,令到乘客扣上安全帶都會左仆右倒,唔好脾氣嘅就會破口大罵㗎嘞。好彩,C女士等多一陣,剛啱有馬主朋友使車經過,於是急急跳上順風車。
香港的士司機愛揀客,為人詬病已久。唔係話唔值得同情呀,假如你做司機,在馬場等足半小時,輪到一位乘客話上駿景園,內心激氣理所當然,但既是公共車輛司機,邊度會一日由朝到晚會接到客人由天水圍去觀塘,跟住上客由觀塘去貝沙灣,然後又輪到一個客去機場咁爽神㗎!接到一個極短途客,最多嘆一句運滯嘅啫,唔使故意與其他司機用對講機講曬粗口指桑罵槐呀嗎?C女士有一次就係叫的士由火炭車站去晉名峰,司機拒載,但即刻有一架的士隨後而至,老司機俾C女士上車,唔出聲,去到晉名峰竟有客人立即接住上車,話去機場,老司機當堂笑曬,可謂好心有好報!現在香港研究發牌俾甚麼優質的士,約600架,左丁山雖然未知詳情,但身為的士常客,一定舉腳贊成,將來呢類的士或者會貴啲,但如果服務可靠,有禮貌,車廂乾淨嘅話,已經抵番,實在唔想久唔久就受的士司機氣也。有新競爭,自然會影響既得利益集團,有人或者會去搞的士圍堵政府總部抗議,如果新特首因此腳軟而不推行優質的士嘅話,就枉稱「好打得」咯。


本文來源:http://hk.apple.nextmedia.com/realtime/supplement/20170411/56544905




Tag:
本文链接:http://www.thaiboxinghk.com/6785.html