【李八方online】力爭九西出線權 民協料月尾初選-www.thaiboxinghk.com

【李八方online】力爭九西出線權 民協料月尾初選

立法會宣誓案,青年新政梁頌恆同游蕙禎雖然上訴到終審法院,各大政黨政團卻已磨刀霍霍,準備派人出戰新東同九西嘅補選。上屆立法會選舉,民協全軍盡墨,連向來橋頭堡九西都失守,今次有機會收復失地,難怪都想派人出選,據知曾經出戰超級區議會、29歲嘅何啟明同戰意幾十年如一日、64歲嘅馮檢基,都有意代黨披甲。

八方打探過,民協最快本月尾有初選,而初選機制都喺黨內議論紛紛,認為唔應該單睇民調決定出戰人選,而係要全方面比較二人優劣。點解呢?因為如果用民調,從政多年嘅阿基就有絕對優勢,但民協內部卻有強烈聲音要求換新血喎!

之不過咁,補選係單議席單票制,同一陣營派出愈多名單就愈唔著數,因為只會分散票源。聽講負責協調嘅民主動力仲未就補選起動,民主黨、公民黨、自決派等都蠢蠢欲動,民協就算搞得掂內部初選,都仲要同民主派拗手瓜先至得。

本文来源:http://hk.apple.nextmedia.com/realtime/news/20170410/56543590




Tag:
本文链接:http://www.thaiboxinghk.com/6576.html