死撐新空管安全 官僚睜眼說瞎話-www.thaiboxinghk.com

死撐新空管安全 官僚睜眼說瞎話

咩叫千揀萬揀揀着個爛燈盞,港府大拿拿花十五億元公帑購買嘅新空管系統,甩漏多多,三日唔埋兩日出事,就係最典型例子。入錯次貨都算嘞,民航處仲一味死撐,話有關系統「達國際水平」,仲有冇再離譜啲吖!

早排民航處係威係勢,成立專家小組對新空管系統進行評估,當時唔少人已經估係走過場,姿勢大於實際,果然不幸言中。專家小組尋日通過中期報告,話比較過歐洲數據,認為新系統可用性達國際水平;佢哋又吹噓備用系統至今未用過,顯示主系統達到百分之九十九點九最佳水平喎。

講就天下無敵,實情又係點?聽吓同樣嚟自航空界嘅立法會議員點講。佢話喎,自從上個月系統軟件更新後,唔單止鬼機情況仍持續出現,飛機起飛後屏幕顯示嘅飛機資料有時更會一直停留喺屏幕上,直至四、五分鐘後至重新連結航機正確位置。佢仲踢爆新空管系統七種安全設定中,包括撞山警示等三種功能冇運作到,直斥系統舊問題未解決,新問題又接踵而來。

冇錯喇,新系統啟用不足半年,耐唔耐就出現「消失的幾十秒」,再唔係就航班間距低於安全標準,乘客簡直有得震冇得瞓。系統錯漏百出不特止,公帑仲要不斷填氹維修,每年閒閒哋講緊過千萬元,咁都叫做「達國際水平」,分明呃市民膝頭哥唔食辣椒醬啫。

唔怕貨比貨,最怕唔識貨。之前有民航處員工爆料,新系統啟用首個月就出現超過八十次安全警示失誤,而舊系統出現誤鳴嘅機率只有百分之一;查實呢個廢系統本來已經好少地方用,早前購入嘅印度機場已經停用,杜拜機場更索性改由人手寫紙仔代替。唔使問阿貴,當初梗係有人入錯貨喇!

一般嚟講,貨物出現問題應該追瘦個商家至係,奇就奇在民航處鬼咁大方,唔單止講到明唔會向供應商追究及追討,仲儼然供應商代言人上身,強調雷達本身技術性能限制,加上香港地勢影響,唔關供應商事喎。咪畀人睇死,一早有立法會議員質疑新空管系統採購過程涉及利益輸送,要求廉記徹查,家陣前任民航處處長已經無從追究,當時仲有冇其他官員經手,冇人話得埋,佢哋為求自保,最穩陣嘅做法梗係死撐新系統買得好,買得妙,買得呱呱叫。至於係咪向供應商追討反而好閒,反正都係公家錢,試吓自己真金白銀硬掘,莫講話十五億,萬五銀都鬼殺咁嘈喇,下話!

一句講晒,火車不是推的,牛皮不是吹的。唔使幾耐又到暑假航空交通高峰期,萬一到時空管系統有咩冬瓜豆腐,搞出個大頭佛,民航官僚「提頭來見」都唔掂吖!


本文来源:http://orientaldaily.on.cc/cnt/news/20170404/00190_001.html




Tag:
本文链接:http://www.thaiboxinghk.com/5765.html