政情:活禽報告出爐 何俊賢換衫見人

政府尋日公布研究本港活家禽未來路向嘅報告,並展開兩個月嘅公眾諮詢,立法會漁農界議員何俊賢(高佬賢)冇預料到報告會喺尋日出爐,殺佢一個措手不及。

何俊賢一副殘樣咁回應活雞報告。(陳嘉順攝)何俊賢一副殘樣咁回應活雞報告。(陳嘉順攝)

出海視察非法拖網捕魚

高佬賢尋日以英超球隊曼聯衞衣示人,又話唔知報告尋日出爐,早知會著「靚啲」先見記者。另外,佢頭髮蓬鬆兼且好似瞓唔夠咁嘅樣,仲有自知之明咁話:「我真係好殘」,然後就轉頭走入洗手間稍作梳洗再現身。但梳好頭之後,又因為球衣關係,因而即場除咗件衞衣先做回應。

高佬賢事後解釋,因為尋晚要出海所以打扮較為輕便。不過,佢出海唔係去玩,而係去大小鴉洲一帶就非法拖網捕魚做實地視察同資料搜集。佢又透露,政府已喺一二年立法禁止拖網捕魚,但仍然有人知法犯法,即使漁民報警舉報亦未能杜絕,所以決定親身去視察,搜集資料同數據作出跟進。

佢形容海洋現時「日日遭人強姦」,亦接獲唔少漁民投訴,所以未來會花多啲時間喺呢個議題做工夫,例如做統計、錄影等嚟證明問題係存在嘅,而佢亦鼓勵漁民多啲舉報添!

本文來源:http://orientaldaily.on.cc/cnt/news/20170404/00176_092.html




Tag:
本文链接:http://www.thaiboxinghk.com/5759.html