腐肉有損健康 廢官靠害市民-www.thaiboxinghk.com

腐肉有損健康 廢官靠害市民

唔講唔知道,中國古時候對食品安全嘅監管非常嚴格,商戶售賣腐肉唔止要受罰,官員把關不力仲要連坐處分甚至判死刑添。照呢個標準睇,港產官僚千刀萬剮都不足以謝天下喎。

嗱,巴西腐肉風波愈鬧愈大,食安中心係就係宣佈停止所有巴西凍肉進口,但就堅持唔回收或停售市面存貨,即係任由腐肉繼續賣通街啫。唔少食肆自行將涉及巴西食材嘅菜式下架,對比港府嘅卸膊做法,簡直係有良心咯。

聽嚇食衞局局長高永文點講喇。佢老哥話喎,目前只知道巴西有二十一間肉商接受調查,其中五間嘅產品有進口本港,但品種、批次等資料仍然缺乏,而且巴西肉佔香港肉類市場高達三成份額,唔可以全部斷然回收,食安中心會喺零售點進行抽查喎。咁即係點?即係通知入口商可以繼續售賣腐肉,繼續靠害消費者囉!

喂,高局長呀高局長,明知腐肉致癌,唔係拿拿臨回收停售,反而允許繼續賣通街,即係將商家利益置於市民健康之上,有冇再離譜啲吖。如果話腐肉數量多就可以不回收,咁警察就唔使捉賊咯,事關賊人多吖嘛!醫生唔使救人咯,因為病人多吖嘛!咁嘅藉口都噏得出,想唔話港產官僚食腐肉食到懵咗都唔得喇。

講到口水都乾,本港食安監管之所以存在極大漏洞,劣食毒食之所以如入無人之境,根源出在未有建立食品源頭追蹤機制。好似年前爆發嘅黑心豬油醜聞咁,港府起初仲賴台灣靠害,點知查嚟查去,後來至知毒豬油嘅源頭來自香港,簡直醜出國際。事後高永文信誓旦旦話會建立食品追蹤機制,結果講咗等於做咗,到家陣都未見影,好似今次巴西入口凍肉出咗事,當局都不知從何做起。香港食安警鐘長鳴,家陣知點解喇。

難為香港自詡美食天堂,實際上係毒食天堂,由蘇丹紅禽蛋到塑化劑飲品,由上海臭肉到巴西腐肉,由黑心豬油到重金屬兼夾農藥殘留蔬菜,好似玩點指兵兵咁,梗有一瓣出事。最弊當局永遠後知後覺,頭痛醫頭,腳痛醫腳,次次出咗事手忙腳亂,完全冇吸取教訓。好心啦,係人都知天下烏鴉一般黑,黑心食品並唔係兩岸嘅專利,全世界都有無良奸商,港府把關一味懶懶閒,即係攞市民嘅健康較飛咋,即係草菅人命咋。

計功夫茶話齋,腐肉有損健康,廢官危害香港。為市民健康着想,以後不如索性使用古代嘅食品檢查制度,由食衞官僚做人肉檢查員,試食各種進口食品,冇事至准賣出街,咁起碼都叫做對得住高薪厚祿吖。


本文來源:http://orientaldaily.on.cc/cnt/news/20170323/00190_001.html




Tag:
本文連結:http://www.thaiboxinghk.com/3882.html