政情:為老友入仁濟 楊志雄拉埋囝囝-www.thaiboxinghk.com

政情:為老友入仁濟 楊志雄拉埋囝囝

仁濟醫院早前舉行慈善餐舞會為年度籌款發力,亦象徵候任主席嚴徐玉珊距離坐正嘅日子已進入倒數。「耳機大王」中華廠商聯合會副會長楊志雄(Johnny)為咗撐老友,決定再次重返仁濟做新丁總理,但佢一早已經係仁濟人,仲出出入入董事局好多次,卓妮問佢究竟出入咗幾多次?佢笑稱唔記得咗添!

楊志雄(左起)、陳明耀同嚴玉麟十分老友。(余素月攝)楊志雄(左起)、陳明耀同嚴玉麟十分老友。(余素月攝)

Johnny話每次加入仁濟都係為咗撐老友,今次返嚟梗係撐嚴太,仲話唔撐唔得添!佢大讚近年仁濟形象愈嚟愈年輕,嚟緊幾位排隊上位嘅副主席都好年輕,未來實有一番新景象,所以佢打算下一屆叫埋阿仔加入仁濟。為撐老友而做新丁總理嘅仲有健康快車香港基金副主席陳明耀,佢同嚴太老公嚴玉麟係工業界多年老友,梗要以行動支持。

50周年 鄭承峰:要重新定位

講到仁濟嘅發展勢頭幾好,主席鄭承峰都好認同。今年適逢仁濟成立五十周年嘅大日子,佢認為係時候思考重新定位,究竟未來發展方向係「立足荃灣,服務全港」,定係繼續「立足荃灣,服務荃灣」喎!查實依家仁濟嘅服務已擴展到港島及九龍,無論如何都唔會只係服務荃灣居民喇!

許夏林(左二)及太太Isa(左一)同王賢訊夫婦(右一及二)係多年好友。(葉華英攝)許夏林(左二)及太太Isa(左一)同王賢訊夫婦(右一及二)係多年好友。(葉華英攝)

同場仲有仁濟副主席王賢訊同老友許夏林(Eddie)。Eddie十幾年前為咗氹仔女開心,設計咗一隻表情多多嘅黃色鴨仔,後來更加變成一門生意,至今相關產品多達三、四千款。咁呢隻鴨仔同「變形金剛之父」林亮嘅經典鴨有乜唔同?Eddie笑稱經典鴨嘅表情比較傳統喎。

卓妮


本文來源:http://orientaldaily.on.cc/cnt/news/20170321/00176_100.html




Tag:
本文链接:http://www.thaiboxinghk.com/3562.html