【鳩嗚乜乜乜】實試récolte電鍋 費清都變廚神-www.thaiboxinghk.com

【鳩嗚乜乜乜】實試récolte電鍋 費清都變廚神

雖然Bruno早前大熱,但費清不為所動,但今次récolte小電鍋終於畀個friend港女茵導咗,加入搶購行列。萬X上星期起以印花換購日本récolte迷你家電,喺網上掀起熱潮,尤其係小電鍋搶過你死我活,去過幾間分店都話換曬,好在靚女Chanda阿媽勁幫費清搶到一個。(伯母萬歲!)

費清會買小電鍋都係因為經常喺公司pantry自己煮嘢食(而家好興呢種健康膳食,但費清都係鼻祖,兩年前已經咁做啦),所以第一間喺公司實試。

小電鍋有四大功能,蒸、煮、烤、炸,費清先試煮韓國泡麵(比一般即食麵更需時),並調較最大的3號火力,結果不鏽鋼鍋要4分半鐘先水滾,比一般電鍋慢少少,但好處係就算滾起都唔會滾瀉,熱水唔會濺到周圍都係,而且只要調較至2或1號火力就唔會太滾。(費清用過其他電鍋,除咗會滾瀉,個火力調較更加只係裝飾品...)總共花咗4分鐘煮麵、金菇、魚蛋,期間火力均勻。

另外亦測試煎盤,因屬易潔鑊面,所以只加少少油,開到3號加熱,就打兩隻蛋落去,即時嗞嗞聲,當然唔可以同猛鑊比,但火力算唔錯,因為好快蛋已經有焦香,再等兩分鐘左右,輕輕一剷已經剷起兩隻太陽蛋,外觀亦都似模似樣,亦都冇痴底。總共花咗8分鐘左右已經完成雙蛋金菇魚蛋麵,賣相算不俗。

不過,電鍋設計都有啲問題,例如不鏽鋼鍋並冇把手,煮完嘢就咁攞起好辣手,一個唔小心就會倒瀉好危險,所以最好用隔熱手套,同埋最好觸摸最後圍部分,因為呢度係屈咗出嚟,冇咁接近電熱板,溫度相對冇咁高。

另外,不鏽鋼鍋內有一個刻度max,根據說明書,應該係油炸用時,放食油唔可以超過嘅高度;費清煮麵時放水去到呢個高度,結果啲麵唔夠湯,所以煮嘢時放水可以稍為高過呢個刻度。另外仲有個油炸圈附熱油濺出,費清冇試過油炸唔知得唔得喎,但見朋友喺fb試炸雞翼都似模似樣。(斷估都應該唔會喺pantry炸嘢嘅...或者等下次公司少啲人再試嚇...)

至於蒸嘢都要小心,因為附有嘅蒸架只有約2cm高,即係鍋內唔可以放太多水,所以蒸嘢嘅時候一定要睇住,小心乾水。港女茵試咗蒸菜,煎牛柳配烏冬,效果都唔錯。

查實,呢個鍋笨唔係咩新發明,亦唔係高科技,份量亦只夠一個人(或者加一個少少厭食嘅),買唔買得過當然見仁見智,但如果貪圖美色嘅不妨一試,電鍋個樣唔錯㗎,費清喺日本旅行已睇中,奈何當地電壓唔同香港,而呢個係香港行貨,換購價270幾蚊,日本amazon都要6,000幾yen㗎(約450港元)。

費清#要生計,也要生活#毋忘初衷

本文來源:http://hk.apple.nextmedia.com/realtime/news/20170318/56438457




Tag:
本文連結:http://www.thaiboxinghk.com/3372.html