政情:搞乜都衰 戴耀廷跌Watt到底-www.thaiboxinghk.com

政情:搞乜都衰 戴耀廷跌Watt到底

特首選舉仲有唔夠十日就投票,選舉氣氛理應轉趨熱烈,但係由佔中發起人、港大法律係副教授戴耀廷發起嘅「2017特首選舉民間投票」,至今隻有約四萬人投咗票,距離一百萬人投票嘅目標好遠。為今次特首民投所搞嘅眾籌亦收唔夠數,隨時蝕大本收場。最重要嘅係,兩大泛民政黨民主黨同公民黨,近日已先後公開表明旗下選委嘅投票意向,擺明當戴耀廷嘅特首民投係廢嘅。今次特首民投無人理,反映戴耀廷對泛民政團、以至對廣大泛民支持者嘅影響力已經跌曬Watt!

雷動計劃 失敗收場

戴耀廷搞到今日咁嘅田地,其實都係咎由自取。記得三年前,戴耀廷猶如泛民嘅「精神領袖」兼「理論大師」,佢提倡嘅商討日、公民投票、以及「愛與和平佔領中環」等理念同行動,獲得大部分泛民政團同支持者一呼百應,聲勢一時無兩。不過,隨著佔中行動畀班學生哥中途騎劫咗,之後行動完全失控,由愛與和平變成仇恨與暴力,到歷時七十九日都唔肯自行撤離,一度搞到一眾泛民政客民望急跌,去到邊都畀人鬧。

佔領清場後,戴耀廷仲唔識得收手,喺去年立法會選舉期間提出「雷動計劃」,揚言可透過指揮一班所謂嘅「智慧選民」配票,協助泛民候選人取得最多議席。該計劃結果當然又係失敗收場,多名資深泛民議員因不獲雷動配票或有人過度配票而落選,反而建製派喺多區都配票得宜,輸少當贏。

戴耀廷今次發起嘅特首民投,原意係喺泛民選委提名及投票選特首時,可以提供一個民意參考,但民投計劃本身已問題多多,包括被揭手機投票程式有私隱同保安漏洞,嚇怕唔少想參與投票嘅市民。再加上大部分泛民選委因為種種政治盤算,早已「自決」要支持其中一位建製派候選人,自然唔想畀呢個民投結果綑綁。

眾籌不足 愈搞愈蝕

結果三百多名泛民選委當中,隻有約三、四十人承諾會根據民投結果投票。泛民政團唔肯積極為民投計劃宣傳,導致投票開始近一星期隻得約四萬人投咗票、即原定人數嘅百分之四。戴耀廷原本希望眾籌一百五十萬元作為計劃嘅經費,暫時亦隻籌到六十多萬元,一半都唔夠,最後可能唔夠錢找尾數添!戴耀廷尋日仲話要加開多幾個實體票站,希望趁臨尾幾日穀高個投票率喎,想法真係太天真兼太傻,隨時搞得多就蝕得仲多。


本文來源:http://orientaldaily.on.cc/cnt/news/20170318/00176_132.html




Tag:
本文链接:http://www.thaiboxinghk.com/3363.html