【邁向28周年●堅哥爆內幕】揭九鐵鬧鬼真相 壹仔開踢爆先河-www.thaiboxinghk.com

【邁向28周年●堅哥爆內幕】揭九鐵鬧鬼真相 壹仔開踢爆先河

 

葉一堅,人稱堅哥,在傳媒行業打滾三十九年,直到去年在《蘋果日報》社長崗位上退休。今年適逢是《壹週刊》創刊廿七年,曾在1994至1995年任壹週刊時事組副總編輯的他,當然有很多回憶。

他希望,《壹週刊》能在手機世界轉型成功
他希望,《蘋果》報紙版,會有10年20年、甚至30年壽命
39年資深報人,近20多年在壹傳媒渡過,他,知道好多內幕

以前猛將如雲

壹週刊以前最輝煌時,一年可以賺九千萬到一億港幣,記者每年分花紅分到笑,那些機會,可不是現在面臨困局的記者能想象。「以前《壹週刊》人材又鼎盛,我管時事組,有屈穎妍、陳惜姿、徐少驊、黎廷瑤、阿蒙(蒙漢明),粒粒皆星,我嗰時做副總編輯冇咩做,都係安排稿幾時出,幾時要交頭條,幾時要交封面,個個獨當一面,例如陳惜姿和屈穎妍,一個筆神一個筆聖,邊度使改稿。」堅哥回憶說。

從零開始,《壹週刊》開多元化題目類型,這都是以前報人聞所未聞的方式。「我諗以前古仔係精彩好多,好多新瓣數開出來,譬如話張劍虹帶領富豪Beat,起富豪底富豪間屋,富豪身家,富豪嘅老婆,富豪嘅仔女,富豪嘅車,每一個題目就係一個封面,以前好輝煌。」

開創香港踢爆文化
但要數《壹週刊》最經典文化,就當然是踢爆系列,把社會上不為人知或陰暗的現象,由記者去親身接觸,並加以踢爆。「另外又走了一條路出來,一系列咁,你想睇富豪嘅嘢,壹週到就有,情色嘅壹週刊又有哦,嗰時仲有個係踢爆嘅,買咗壹週刊就肯定有一隻。」

九十年代的社會雖然繁榮,但民智尚不及現在,很多騙人或迷信的事情,仍在民間甚行,《壹週刊》的出現,可謂因緣際會,大量的題材等著去發掘,可謂長做長有。「以前好多呢啲嘢睇,仲有咩神棍呀,你依家就知神棍係呃人,但以前社會好多人信,呢個又會隔空取物,嗰個又拉你個心臟出來,我哋做記者百分百知係假,但好多人信哦,我哋就去踢爆,仲踢到去菲律賓。」

要做這類踢爆故事,最重要就是記者親身參與,甚至自己去被人騙一次,這樣才能掌握整個過程,讀者看起來也特別過癮。「即係唔係好難哦,攝影師就知,係個角度問題,可以影到好似成隻手擺了入去個內臟度,攝影角度問題,旁邊有啲血,再放隻手入去呃人,我哋仲影了佢個雪櫃入邊,有大把內臟,豬肝牛肝都有,當時好多呢類踢爆。」

踢爆只有雜誌做
94年堅哥加入《壹週刊》,當時的社會正是經濟起飛,各種古靈精怪現象都有,於是踢爆社會陰暗面,一度成為雜誌的主打內容。「到我94年入去,就針對偏峰嘢系列,做了唔少古仔。譬如個時北姑雞剛剛殺到香港,冇咩傳媒講,大家都談論緊,又覺得神秘,嗰時就因此好多呢類情色嘢。」

經過多年踢爆,香港社會能揭的陰暗面已經差不多揭完,加上網絡流行,大家很容易獲得不同資訊,相比以前,讀者對《壹週刊》的依賴性已大大減弱,堅哥也覺得雜誌的路比以前更難行。「依家《壹週刊》好難再開新嘅範疇出來做,報紙都做緊雜誌嘅嘢,但以前冇咩人做呢類故仔,以前得壹週刊同東週刊鬥,依家淨係即時新聞都搶晒你啦。」

經典鬼故踢爆

《壹週刊》以前踢爆過一個關於火車的鬼故事,或許不少九十代的讀者仍有印象,那就是以前有個KCR廣告,畫面是一班小朋友搭著膊頭扮火車,很經典的廣告。「但後來社會流傳,話參與拍攝嘅細路仔全部死晒,以前冇互聯網唔知真假。」

傳聞愈演愈烈,更傳廣告中的幾個小朋友,都是在大陸找來拍攝,因為香港小朋友的樣子不夠大陸人純真。「其實個廣告拍得幾好,但後來傳個班細路仔全部死晒,傳到鬼咁逼真,呢個點死個個又點死,幾時又死一個咁,總之全部死晒,咁邊個去踢爆呢,咪又《壹週刊》囉。」

其他傳媒模仿
《壹週刊》因此做了個封面,踢爆這個傳聞是假的,更上大陸把參與拍攝的小朋友全部找到,證明一個都沒有少,社會傳言立即終止。「我哋搵番晒大陸個啲細路仔,個期踢爆封面賣到加印,以前消息唔流通,太需要報紙雜誌存在。」

《壹週刊》開創的文化和做新聞手法,後來被其他傳媒爭相模仿。「嗰時雜誌梗係好做啦,競爭細嘛,當時做完再重新包裝,重新出一次又得,譬如有個大賊出來,《壹週刊》將佢由頭包裝過,標題是另外一個角度,就好好賣㗎啦。以前社會多罪案,多古靈精怪嘢,依家社會進步,經濟好咗,大賊都少咗。」

而壹傳媒其後勇闖台灣,亦是因為練就了這身武功,所以很快在台灣打出名堂。「我哋做落嘅方法,題材呀,我覺得到台灣蘋果創刊時唔難,將以前做開嘅富豪踢爆、各種踢爆方法轉移過去,台灣社會仲多呢類古靈精怪嘢,台灣都係抄香港模式,複製過去,我覺得唔難。」

堅哥在《蘋果日報》的辦公室內,跟記者談了個多小時,幾十年的傳媒歲月,就那樣一貶眼就過了,當年的波瀾壯闊,今天聽起來仍叫人震動。

撰文:麥景慶
攝影:蔡福生

【邁向28】《壹週刊》27周年全面睇
http://bit.ly/nextb28thbig


本文来源:http://nextplus.nextmedia.com/news/latest/20170315/487023




Tag:
本文链接:http://www.thaiboxinghk.com/3220.html