【即時文摘】美國對華無政策(左丁山)

【即時文摘】美國對華無政策(左丁山)

一位美國朋友來港四日,開會不停,問左丁山有無時間見面,左度右度之下,發覺彼此最方便嘅時間就係在沙田吃晚飯,於是去咗沙田馬會凱旋廳,本來問佢去唔去五樓Centurion食西餐嘅,嗰度氣氛好,夠靜局,水準又唔錯,吃晚飯甚為舒適,但朋友Y一於話唔制:「我來自New Haven,冇靚中國菜食,到香港梗係要食中餐啦。」講得好有道理,咁就兩支公在凱旋又食又傾兩個幾小時。
佢問左丁山中國、香港近況,左丁山就問佢特朗普之對華政策究竟係點,朋友Y大笑曰:「全個耶魯都怕幾難搵到一個特朗普支持者,人人對佢失望。我地有一位系出名門,成績優異畢業生,本來有雄心壯志從政,預備到白宮做見習生,點知特朗普當選咗,呢位畢業生嬲到放棄入研究院,走來香港靜一靜,過番兩年Gap Year先,或者順便學埋中文、普通話啦。」學完中文最好學做埋中國通。
耶魯優秀學生中有一位包大可(1942年畢業)(Doak Barnett)係著名中國通,曾影響1950-1960年代美國對華政策,佢在哥倫比亞大學教書,論輩份又有學生級嘅Michel Oksenberg,及Kenneth Lieberthal分別為卡達總統與克林頓總統嘅中國顧問,追蹤遠一啲,耶魯、哈佛、哥倫比亞、密芝根四間大學培養出來嘅中國專家,足足影響美國對華政策近70年。不過朋友Y話:「現在冇咯,特朗普嘅白宮未見有中國通,真正中國通恐怕亦唔肯為咁嘅總統服務。」咁又係,特朗普係富豪二代商人,入主白宮後,比較重用軍人與華爾街人物(特別係高盛幫),著名大學教授就一個都冇。美國傳媒報導,美國國務院有不少助理國務卿級嘅職位未曾有人替補,前埃克森美孚嘅行政總裁帝勒森做咗國務卿唔多聽國務院專業外交官意見,所以不少資深外交官離休他去。任性總統實行Twitter外交,得罪人唔駛本,一個世界超級強國竟然選出一個咁樣「童言無忌」式嘅總統,寫電影劇本都冇咁荒謬。朋友Y說特朗普根本無一套完整對華政策,只係見貿易講貿易,見軍事講軍事,隨機應變而已。此乃美國商人本色,非美國總統所為,正中北京下懷,好似班農咁,在白宮本是反中急先鋒,被炒後,立即為咗出場費來港出席中信里昂投資論壇,跟住應王岐山之召,秘訪北京再談,相信必有足夠利益為誘因!基辛格憑中國關係收顧問費收到依家90幾歲,班農又想學習?怕難啲啩!

本文來源:http://hk.apple.nextmedia.com/realtime/supplement/20171002/57278015




Tag:
本文链接:http://www.thaiboxinghk.com/28640.html