政情:抽中新款遊戲機陳克勤急曬命申報-www.thaiboxinghk.com

政情:抽中新款遊戲機陳克勤急曬命申報

立法會議員如果收受咗貴重禮物就需要向立法會秘書處申報個人利益,不過立法會議員陳克勤就未收到禮物已經「申報」定先喇。克勤話,佢早前出席活動時參加抽獎,抽中咗日本知名牌子嘅遊戲機。雖然部遊戲機都仲未到手,但佢尋日中午就已經喺社交網站「曬命」有新玩具,兼且表明會向秘書處申報,真係心急。

陳克勤喺社交網站「曬命」有新遊戲機。(互聯網圖片)陳克勤喺社交網站「曬命」有新遊戲機。(互聯網圖片)

尋日先開售 港少貨勁搶手

克勤日前曾透露,早排出席一間公司周年晚宴時抽中咗大獎,不過份獎品要隔幾個星期先拎到。份獎品咁神秘,原來係尋日先喺日本正式開售嘅遊戲機,價值港幣二千三百蚊。香港雖然都係首發地區之一,但都只係得幾千部,認真矜貴。

雖然克勤尋日下午開完會先去拎獎品,但其實前晚佢已經率先試玩咗喇。佢就話,新遊戲機畫面精美、手掣設計得意多變,而且仲有多個適合一班人玩嘅遊戲。不過佢自己平時比較忙,都冇乜時間玩,所以諗住帶返辦事處,同班助理「開心share(分享)」喎。


本文來源:http://orientaldaily.on.cc/cnt/news/20170304/00176_133.html




Tag:
本文連結:http://www.thaiboxinghk.com/2623.html