【即時文摘】影子作家(余家強)-www.thaiboxinghk.com

【即時文摘】影子作家(余家強)

早前本欄講今年火雞年(丁酉年)立春八字顯示,年內防水災多過防火災,估唔到應驗在澳門,以至到美國德州亦有颶風之後,洪水為患。颱風颶風固然係天災,正是天有不測之風雲,但在我地比較熟悉嘅澳門,似乎人禍因素比天災更重要。
左丁山識得不少朋友來自澳門,多數係讀完小學之後就來港讀中學,考入大學嘅,例如兩位報界資深編輯,L君與C君。兩人都係文筆銳利,分析細緻,見解獨到嘅報壇精英,可惜人到中年之後,難敵本港報壇生態惡化,唯有選擇退休,最近又有一位E君退休,令左丁山愕然,若謂與薪酬成本無關,左丁山不信也。
C君有同學讀完書返回澳門之後,最近榮升澳門金管局行政委員會主席陳守信(1987年浸會大學經濟系畢業,港大博士,8月26日生效),本欲回澳門一行,但見到天鴿襲澳門,令澳門死了十人,為之神傷,決定唔返去住。佢從網上圖片睇到十月初五街之水浸以及垃圾滿地,唉聲嘆氣話:「條街有幾長吖,十分鐘就行完,政府竟然連執邋遢都無力,要出動解放軍,你話幾羞家,更連累解放軍入城執邋遢時有四人中暑暈低,影響解放軍之戰無必勝(習近平要求)形象,澳門特區政府更係罪加一等!」
好彩C君封筆已久,否則佢在報紙上發表如此評論,返澳門會被拒絕入境都似,乜唔係啫,蘋果日報記者被拒入境就係屬於「你懂的」一類,但香港01及南華早報記者都被拒入境,可見澳門政府話事人情急之下,亂了方寸,睇真吓01與南早嘅老闆姓乜,都唔會犯此錯誤啦!
其實香港報紙對澳門政府及澳門金玉其外之建設,批評已算客氣,小YY話網上更多難聽說話,傷害了「澳門人民的感情。」佢一位澳門老友對佢講:「請香港人講少一句當幫忙!」又有另外一位朋友話,8月23日早上狂風暴雨襲澳門,好快已經水浸街,繼而停電,電話網絡大亂,大部份人根本無法子落樓出門,包括高官在內,所以澳門政府好似突然停擺,一時之間無人指揮救災,係可以理解嘅,如此解釋,可以聽住先,但急促水浸與停電,就一定係長久以來澳門政府疏忽基本建設(防洪與鞏固發電基礎)嘅直接結果,一旦有天災突襲,就弱點畢露。國家領導人以前猛話澳門好,香港噪音太多,當然係政治掛帥之言,當不得真,如果有朝一日,香港淪落到要向澳門學習管治,香港就該煨咯。


本文來源:http://hk.apple.nextmedia.com/realtime/supplement/20170901/57151955




Tag:
本文链接:http://www.thaiboxinghk.com/25246.html