黃絲黨招搖撞騙 搞革命又驚被殺-www.thaiboxinghk.com

黃絲黨招搖撞騙 搞革命又驚被殺

香港年輕人自殺問題嚴重,正當社會各界齊心合力救救孩子,有啲人卻喺背後乘機抽水,掛住關愛青年羊頭,販賣仇恨暴力狗肉,暗啞底鼓動青少年反社會反政府,甚至連正義傳媒都郁埋,簡直人人得而誅之!

話說有個自稱「防止青年被殺協會」嘅物體,尋日喺臉書發表所謂聲明,針對《東方日報》日前就一名年輕人自殺嘅報道,左一句「鉅細靡遺嘅報道及紀(記)錄手法,實在令人嗤之以鼻」,右一句報道「對死者家人、朋友造成二次打擊」。咁就奇怪嘞,查實除咗《東方》之外,全港仲有五份報紙作相關報道,無論篇幅同內容都大同小異,該組織獨獨針對《東方》,干預我哋新聞編採自由,到底是何居心?

話時話,「防止青年被殺協會」,淨係個名已經不倫不類,陰陽怪氣,佢哋口口聲聲「老屎忽透過奴役年輕人解放自己」,挑動世代之間仇恨,又叫年輕人「留番條命報復社會,以你嘅生命嚟證明佢地(哋)係錯」,仲揚言同年輕人一齊「搞呢場革命」、對付「黑警」,擺明車馬鼓動「勇武抗爭」。一睇就知,呢個組織係黃絲外圍,求其作個名招搖撞騙咁解嘅啫。

最離譜嘅係,呢班友唔係社工,亦唔係心理學家,而係一群「無受過專業訓練的香港年青(輕)人」,如果有人真係病急亂投醫,接受呢班鍵盤戰士「輔導」,分分鐘死多幾錢重都似。咁都未算,該組織唔似得一般機構咁接受求助畸士,而係好多時踩上其他正規機構處「挑機」、「狙擊」,甚至不惜發動網上罵戰,「唱衰」對方,手法同搞佔領同街頭暴動嘅「勇武派」如出一轍,同激進組織招募人肉炸彈死士唔差得幾遠,年輕人受其蠱惑,後果不堪設想。

不過你咪理,曹操都有知心友,漢奸黎旗下「爛果報」曾為該組織抬轎,大唱讚歌,連創辦人「睜着一雙大眼睛,散發開朗氣息」都噏得出,肉麻當有趣,想唔認契弟都唔得。物以類聚,人以群分,呢班友獲淫媒青睞,係咩貨色,畫公仔唔使畫出腸喇啩。

毛伯伯就講得啱嘞,「革命不是請客吃飯」,又要搞革命又冇預到拋頭顱灑熱血,仲想「防止被殺」,呢個世界冇咁便宜嘅事。至於有人要咬住《東方》唔放,道理其實一字咁淺,木秀於林,風必摧之,我哋一直企穩民族立場,弘揚正氣,自然成為一眾魑魅魍魎、牛鬼蛇神嘅眼中釘、肉中刺!

套用解放軍發言人嗰句,撼山易,撼東方難!我哋連港英餘孽、洋奴漢奸都未驚過,小妖小邪更加不在話下,即管放馬過嚟喇!


本文來源:http://orientaldaily.on.cc/cnt/news/20170726/00190_001.html




Tag:
本文連結:http://www.thaiboxinghk.com/20378.html