政情:孫公挺蔡若蓮做副局 撲火恐變撥火-www.thaiboxinghk.com

政情:孫公挺蔡若蓮做副局 撲火恐變撥火

政圈流傳,曾喺立法會教育界選舉中落敗嘅教聯會副主席蔡若蓮係教育局副局長人選之一,但未確定佢係咪入熱廚房就惹起外界聯署反對。教育局前局長孫明揚(孫公)尋日出席一個活動時就話有反對者係「為反對而反對」,反問點解要擔心蔡若蓮做副局長,更以自己做教育局局長前,亦都冇教育經驗為例,指作為領導階層,最重要係有眼界、視野同埋識得解決問題。孫公咁講,似係幫蔡若蓮撲火喎,唔通佢都撐蔡若蓮做副局長?咁講會唔會有反效果,反而變咗撥火呢?

話領導層最緊要識解決問題

孫公話唔太認識蔡若蓮,掌握唔到大部分資料,難以正式回答蔡若蓮係咪勝任,但最重要係有心同有辦事能力,舉例指自己做教育局局長前,亦冇教育經驗,作為領導階層,所需要嘅並唔係專業知識,因為團隊中會有人支援,專業人士會畀專業意見,領導層最重要嘅係要有眼界、視野、經驗同人脈,以及識得解決問題。

會唔會擔心蔡若蓮出任副局長?孫公反問「點解擔心,佢做咗啲乜嘢係我應該擔心嘅呢」,又話「依家又唔係委任佢去做議員,大家都唔同嘢嚟嘅,幾時有話過輸咗選舉唔可以做(副局長)」。

指有人因背景「為反而反」

孫公又話唔知道外界反對嘅道理喺邊度,但自己以局外人嘅身份冷眼旁觀,認為反對者有啲係「為反對而反對」,因其背景同反對者嘅睇法唔同,令蔡若蓮背負「原罪」,形容好可惜。

被問到外界有指蔡若蓮有如「劉江華第二」、「敗部復活」,孫公就話做官員最重要係有冇實力,其他人重視嘅係做唔做到成績,又話蔡若蓮現時仍未工作,點可以覺得佢係做唔到,唔認為要有憂慮。

依家坊間對蔡若蓮出任副局長一事炒得好熱,就連蔡若蓮日前喺一個活動現身都唔敢多講,話:「唔準備去評論關於我嘅討論」,然而孫公尋日咁講似係為蔡若蓮撲火,之但係外界反對嘅聲音陸續有嚟,而孫公仲話有啲人係為反對而反對,會唔會更加激起反對者把火,到頭嚟撲火變咗撥火呢?咁就要睇下後續發展嘞!


本文来源:http://orientaldaily.on.cc/cnt/news/20170717/00176_078.html




Tag:
本文链接:http://www.thaiboxinghk.com/19435.html