【李八方online】假學歷關注假結婚?林卓廷狙擊「打假博士」-www.thaiboxinghk.com

【李八方online】假學歷關注假結婚?林卓廷狙擊「打假博士」

結婚唔使錢不特止,有錢收之餘仲多咗個老婆仔,咁筍?

假㗎!好似蛋呀、奶粉呀、波鞋等等有假貨,連結婚同學歷都有假㗎!民建聯立法會議員葛珮帆今日就住「假結婚」事宜質詢保安局,如何加強執法打擊假結婚,以免年輕人為搵快錢而誤墮法網咁話。葛博士嘅黨友柯創盛碩士乘勢追擊,質疑保安局未用盡方法向青年宣傳假結婚嘅危害。

保安局局長李家超解畫,話入境處十分關注假結婚嘅情況,自2006年成立以嚟,過去10年已成功檢控1,648宗個案,入境處會繼續加強打擊,同監察各種通訊軟件、社交媒體廣告等等。

民主黨立法會議員林卓廷就對兩位議員嘅意見大表讚同,仲話「全力支持」兩位一齊打假;林卓廷個Facebook專頁,仲專登貼出海報讚揚葛珮帆係「打假博士」,仲有口號「假蛋假波假結婚假學歷 橫掃一切弄虛作假」。

點解聽落說話好似有骨?梗係啦,葛珮帆以前引以為傲嘅博士學歷,喺上屆立法會選舉報稱係來自「Greenwich University, Hawaii」,被獨立股評人David Webb踢爆校址原來係校長住址,學校喺澳洲、美國都未獲政府承認,大學網頁話係巴基斯坦認可喎。柯創盛就更叻仔,去年參選立法會時被《蘋果》查詢學歷問題,連所讀大學叫咩名都講唔出,翌日自己拍片話係入讀英國諾丁漢特倫特大學工商管理碩士,不過兩星期後大學回覆《蘋果》話「查無此人」。

兩位議員嘅學歷有幾真,係咪要再調查?點樣加強打擊假學歷,以免年輕人為快啲搵到好工而誤墮法網?市民都好關注,希望兩位民建聯高材生能夠幫吓手,爭取議員學歷進一步透明化啦。

本文来源:http://hk.apple.nextmedia.com/realtime/news/20170705/56916788




Tag:
本文链接:http://www.thaiboxinghk.com/17844.html