【娥事生非】急推MPF對沖有陰謀 689圖一箭雙「刁」

七一將至,香港特區首長即將換上新人面,花生友早兩星期寫過,梁特卸任前會留下取消強積金對沖嘅爛攤子畀林鄭月娥,果然不出所料,倒數得返一個星期,梁特竟然夾硬推出勞資雙方無共識嘅方案,勞方暫時唔收貨,資方就梗係一肚火,稍後就要睇下新任勞工及福利局局長羅致光(CK),喺呢個爛攤中點樣完善收科?

其實呢壇取消強積金對沖嘅風波,可謂一男子的錯,喺選舉時加入政綱,五年任期落雨收柴時急急未有勞資共識下推出扮做咗,噚日仲極諷刺咁話,如果新一屆政府有取消強積金對沖方案又喺立法會過到關,樂見其成,唔知林鄭個心有冇把幾火?

有商界中人講起強推取消對沖,罵聲四起,不滿CY張單由林鄭去埋,而且仲畀咗難題新一任嘅勞福局局長,仲唔係一箭雙「刁」,刁難林鄭兼佢嘅愛將局長CK,睇下羅嚟自民主派,又有幾巴閉喎。

暫時當然唔知林鄭可否拍住CK,搞得掂呢壇撤對沖風波,唔少工商界明言對CK有期望,覺得相對政務官出身、未做政務司司長前嘅勞福局局長張建宗,更加有得傾,皆因張畀佢哋感覺係永遠的執行者,老闆話乜就乜,冇自己己分析,但CK卻係學者出身,覺得佢分析事件時會致力做平衡,加上曾任議員喺政界打滾,知道真正嘅「互諒互讓」係如何煉成。

雖則早前提出過擴濶稅基等建議試水溫,惹來工商界出聲明反駁畀個下馬威佢歎下,外界對CK暫時似乎無乜負評,官場普遍相信佢會有個唔錯嘅起步,至少主要政黨民主黨砌少啲,結局已經大不同。花生友聽聞佢已經約咗社聯執委上任首星期飯聚,打交道兼政治游說!

本文來源:http://hk.apple.nextmedia.com/realtime/news/20170626/56874324




Tag:
本文链接:http://www.thaiboxinghk.com/16605.html