政情:做乜衰乜 評分唔得 Greg蘇死撐自己唔撈

現屆政府任期剩低唔夠兩星期,唔少人已開始為問責官員嘅表現埋單計數。香港研究協會尋日公布現屆政府任內最後一份調查,綜合過去咁多次調查,發現有八成問責官員從未拎過合格分數。幾乎做乜衰乜嘅商務及經濟發展局局長蘇錦樑(Greg),評分一直都低,外界早就預計佢冇得留低,但佢尋日竟然仲話喺特首選舉前已決定唔留任喎。死撐都冇用,佢喺「熱廚房」做成點,大家有眼睇喇!

調查機構喺今個月九號至十五號抽樣訪問逾一千名十八歲或以上市民,一分為非常不滿意,五分為非常滿意。調查發現三名司長同十三名問責局長中,有九人錄得評分下降,教育局局長吳克儉排榜尾,更係唯一一名官員拎得低過兩分,而唯一一名官員評分超過三分就係食物及衞生局局長高永文。而綜合過往調查,更發現有八成問責官員從未拎高過三分。

今次評分同樣唔合格、只得二點五分嘅Greg蘇,尋日接受電台訪問表明喺特首選舉前已決定唔會留任至下屆政府。但佢過往評價甚差,早喺上任副局長時就被爆出用卡片代替入息證明,而坐正後亦被指Hea做搞到要頻頻撲火,好似免費電視牌照、版權條例修訂案等,連港台興建新大樓都久未成事,所以政圈早已傳出換人聲音。到底係Greg蘇早已決定離任,抑或係無人問津焗住走,相信答案已經呼之欲出喇!

發牌風波 靠按穴止哭

Greg蘇仲話當日支持發放三個免費電視牌照,只係行政會議最終決定只發兩個牌照,睇嚟佢又死撐未知衰喎。因為喺兩個牌照發放後,亞洲電視因牌照屆滿而「熄機」,而另外獲發牌嘅奇妙電視,就幾次向政府申請延期補交資料,睇嚟香港電視市場空間有限,佢當初同意發三個牌照都未必係最佳決定。提及喺一三年港視不獲發免費電視牌照後喺電台訪問中哽咽一事,佢就話當時係諗起呢個決定影響三百名港視員工嘅就業機會,有情緒流露,當時希望自己唔好喊出嚟,所以佢按住自己穴道,仲話嗰日佢已盡量克制情緒,「無論如何我都係人」。

陳家強預告重返科大

Greg蘇此地無銀強調早就想走,另一邊廂財經事務及庫務局局長陳家強亦話唔會留任,但佢就踏實得多,話並冇後悔加入政府,反而有好多嘅滿足感,能夠將專業應用,而個人亦有得益,仲話預料將來會重返科技大學咁話添!

本文來源:http://orientaldaily.on.cc/cnt/news/20170620/00176_098.html




Tag:
本文链接:http://www.thaiboxinghk.com/15793.html