政情:囝囝只叫爸爸 何啟明老婆勁呷醋

通常仔女出世後,為人父母最期待就係聽到佢哋叫「爸爸、媽媽」,甚至有啲父母會因為仔女叫邊個先而出現爭風呷醋嘅情況。立法會勞工界議員何啟明育有一個歲幾嘅囝囝,佢透露囝囝成日叫爸爸而唔叫媽媽,搞到老婆「呷醋呷到飛起」。

何啟明(左)同囝囝「父子裝」,着埋同一款波衫。(受訪者提供)何啟明(左)同囝囝「父子裝」,着埋同一款波衫。(受訪者提供)

囝囝除咗成日叫爸爸,啟明仲話平日朝早七點就會出門返工,咁啱囝囝就會喺呢個時候醒,知道爸爸要返工就會係咁喊。不過囝囝只會喺朝早喊咁口,夜晚就唔會等佢返屋企,佢解釋因為囝囝會「自動熄機」喎。

依家社會上有好多「怪獸家長」、「虎爸虎媽」等,大家都想望子成龍而催谷仔女。啟明就認為依家囝囝先得一歲多啲,仲係細個,等遲啲大少少再按興趣去決定。相比之下,佢話太太比較想望子成龍多啲,所以都係等太太話事,為囝囝未來做決定。

屋企播古典音樂 培養興趣

啟明仲透露,依家屋企會播吓莫扎特、貝多芬等古典音樂,希望可以培養囝囝對音樂有興趣,但囝囝似乎反應唔大,反而對調校音量嘅按鈕有興趣,成日「扭嚟扭去」。佢懷疑囝囝可能對科學有興趣,諗住等佢大多少少再畀佢接觸吓啲機械嘢,睇吓係咪真係有興趣先。


本文來源:http://orientaldaily.on.cc/cnt/news/20170619/00176_089.html




Tag:
本文链接:http://www.thaiboxinghk.com/15666.html