【李八方online】馬龍開禪意水墨畫展 胡官余大狀都捧場

【李八方online】馬龍開禪意水墨畫展胡官余大狀都捧場

平時大家接觸馬龍嘅作品,通常都係政治漫畫,透過諷刺時弊,為大家消氣兼出氣,但查實馬龍都有畫其他畫㗎!

聽日(18)起至8月5日,九龍灣宏光道億京中心嘅香港佛光緣美術館會舉辦「馬星原禪意日常水墨畫展」,展出以簡樸筆法,融注日常意趣,帶有禪意嘅畫作。馬星原開畫展,唔係馬龍喎?大家真係有所不知,馬龍就係馬星原,兩個都係筆名唔係真名。

馬龍今日傍晚為畫展揭幕,捧場主禮嘉賓好多,包括退休法官胡國興、民政事務局副局長許曉暉同公民黨余若薇等,馬龍致辭時多謝各路有心人,解釋馬星原呢個筆名約30年前主要用嚟畫插畫,「有時好少留名,逗咗稿費就算,所以呢個筆名唔算流行」。

而佢特別用馬星原筆名畫禪意水墨畫,係想同以馬龍筆名畫嘅政治漫畫分隔下,唔想當中畀人咁多政治鬥爭感覺,保持初心,純真一啲,一如禪意,回歸本源。佢笑笑口話呀,唔少人真係稱呼佢做「馬生」,但查實佢本身姓袁,結果取諧音改名「馬星原」,「馬姓袁,效果都唔錯吖」。

本文來源:http://hk.apple.nextmedia.com/realtime/news/20170617/56842161




Tag:
本文链接:http://www.thaiboxinghk.com/15538.html