【超現實香港】魚塘變球場/巨刀劈街 攝影師:改圖係藝術-www.thaiboxinghk.com

【超現實香港】魚塘變球場/巨刀劈街 攝影師:改圖係藝術

網上流傳一張圖片,深水埗梁添刀廠的刀形招牌掉了下來,還把道路劈開了,照片吸了逾四千like。睇真啲,咦!原來係改圖!乜咁大整蠱呀!這些改圖原來全是Surrealhk的專頁版主Tommy Fung一手改出來。相約他訪問,他一如改圖專頁頭像現身—揹着大型背包、戴着橙色黑超、拿着相機大炮,在街頭像豹捕捉獵物般,隨時隨地咔嚓拍照。

70後Tommy九十年代隨家人移民到南美,當起了全職攝影師。一年前回流到香港,彷彿與舊情人久別重逢,在他眼中,香港地處處熟悉得來又有點新奇,他笑說:「返香港後發現好多香港人對生活麻木,反而我覺得好新奇。希望重新開始,首先想堅持做自己鍾意嘅攝影。」回港後一直以自由身生活,閒時他最愛拿着大炮相機四處游走和行山吸取靈感,後來想倒不如把不同的影像結合改圖,把幻想的事變成「真實」,「香港人幾鍾意改圖,但通常係惡作劇之類,感覺係取笑成份多,負面居多。但其實改圖係一門藝術,可以借改圖表達自己想法。」於是今年二月在facebook和Instagram成立了專頁「Surrealhk」,打正旗號超現實香港,以香港的地標、飲食、傳統節日文化等等作為題材。

刀形招牌劈開馬路 望改圖助關注社會
Tommy指,例如在街頭見到梁添刀廠的刀形招牌,「香港街邊嘅招牌好特別,上次嚟到深水埗見到即刻諗會唔會做到啲搞笑效果,都幾大迴響,好多人都話我將諗過幻想過嘅變成真。」香港交通工具同樣成為他的靈感之泉,電車、van仔、纜車等等,其中一張改圖把紅van加上飛機引擎,大眾一看便有共鳴:「紅van係香港獨有嘅交通工具,特別快同刺激。有次搭小巴,睇住個車速顯示屏係咁變,都幾緊張。」細心望真啲,連紅van車牌改成「I Am 2 Fast」,幽默得令人會心微笑。你以為改圖一定是惡搞?他直言改得靚一點都不容易,需要花很長時間認真執好細節位。他平均一張圖要改數小時,高峯時他試過一張改足十多小時,例如把永安中心的外牆逐條扭成手掌形狀,以搞笑手法代表大平賣時人人用手搶平貨,「每條線每一層要拗曲做成手形,有時改得唔滿意又會重新改過,接駁位要接得很正。」人家改圖玩玩吓,他卻改圖改得如此執着。

平時熱愛看戲的他,甚至會嘗試把不同卡通或電影元素融入改圖,例如他每次回港探親都會去海洋公園,影了很多關於熊貓、纜車的相,就想到把纜車加上有點像多啦A夢的竹蜻蜓翅膀。迷上電影《狂野時速》的他,深深記着無數車衝下來的一幕,又想到改圖,專程到上環拍照:「先搵一幢停車場大廈影相,再喺街道捕捉唔同車,用不同角度取景之後再合成嵌出嚟。」狂野時速重現香港,數輛車從停車場破牆而飛,逼真度如此高,不得不佩服他的創意。雖然回流香港只是一段短時間,但他直言經常留意社會發生的事,政府意圖更改新界魚塘土地用途變成貨倉,他不忿地說:「變貨倉倒不如變成球場,起碼有啲用嘛。」雖然不算熱衷香港政治,但他希望以小市民角度,把自己留意開的社會議題藉改圖告訴他人,「如果有機會去發聲,都應該嘗試將問題講出嚟。」改圖對他而言是一門藝術,更希望以幽默輕鬆的手法表達他關注的社會議題。

「香港仲有好多新奇有趣嘅事物」
不過改圖而家人人都識,P出得臉尖眼大好身材極easy,又點睇先?他思索了一會,回答:「改圖要睇改乜,如果改到連自己都唔認得個樣,我就覺得失去咗意義。但相反,有啲題材要透過改圖先表達到意思,就值得改。」他認為,在人人都識影相的年代,大家睇相睇到麻木晒,但改圖仍然能吸睛,令人留下深刻印象,「香港人生活節奏好急,好多嘢都遺忘咗,想畀唔同人知道香港仲有好多新奇有趣嘅事物,其實香港好好玩!」他希望利用改圖鼓勵香港人笑吓,思考相片背後的意義之餘,更重要的是不要忘記香港的美。

instagram、facebook:Surrealhk
部份圖片由受訪者提供

記者:鍾藹寧
攝影:蕭志南

2017果籽繼續認真知味。識買惜用。行以求知。好事多為。重修舊好。
緊貼果籽報道,即like:http://fb.me/AS.AppleDaily

本文来源:http://hk.apple.nextmedia.com/realtime/supplement/20170601/56761861




Tag:
本文链接:http://www.thaiboxinghk.com/13672.html